Ներկայացնում ենք Համաշխարհային բանկի նախկին գործադիր տնօրեն, «Blue like an Orange Sustainable Capital» ֆոնդի գործադիր տնօրեն եւ հիմնադիր Բերտրան Բադրեի եւ Բրիտանական Կոլումբիայի համալսարանի Ասիական հետազոտությունների ինստիտուտի պատվավոր տնօրեն Իվ Տիբերժիանի հոդվածը՝ գրված Project Syndicate-ի համար:

Բերտրան Բադրե, Իվ Տիբերժիան

Այսօրվա տնտեսական հեռանկարները տարօրինակ կերպով հակասական են: Մինչ գլոբալ շուկաները՝ տեխնոլոգիաների եւ էներգետիկայի գլխավորությամբ, աշխուժացել են կարճաժամկետ բարձր շահույթի պատճառով, Համաշխարհային բանկի եւ Արժույթի միջազգային հիմնադրամի գարնանային ժողովների ժամանակ տրամադրությունը միանշանակ մռայլ էր: Երկու գլոբալ հաստատություններ, որոնք սովորաբար տափակաբանություններ են ասում, խստորեն նախազգուշացրին տնտեսական մասնատման աճող ռիսկերի մասին:

Այն գաղափարը, որ փոխկապակցված համաշխարհային տնտեսությունը կարող է աշխատել աշխարհաքաղաքական համակարգում, որը հիմնված է մոտ 200 պետությունների ինքնիշխանության վրա, միշտ որոշ չափով իդեալիստական էր: Կամ գուցե ամբարտավան: Այս տարօրինակ միասնությունը, ի վերջո, փլուզվեց 1930-ականներին, եւ բաժանումը տեւեց մինչեւ Երկրորդ համաշխարհային պատերազմի ավարտը:

Սակայն իդեալիզմը մեռած չէր, եւ գլոբալ համակարգը հետագայում վերակառուցվեց համաձայնեցված կանոնների, ընդհանուր միջազգային ինստիտուտների, որոշ փոխադարձ հանդուրժողականության եւ ճգնաժամային կառավարման հիմքի վրա: Ի սկզբանե անվտանգության նկատառումները հնարավորինս տարանջատված էին տնտեսությունից, բայց դա հատկապես կարեւոր դարձավ 1990-ականներին, երբ արմատապես տարբեր ռեժիմներով երկրները սկսեցին ինտեգրվել համաշխարհային տնտեսությանը:

Այսօր, սակայն, այս համակարգի հիմքերը արագ քայքայվում են, եւ համաշխարհային տնտեսական ինտեգրումը կարծես թե գնում է հակառակ ուղղությամբ: Ինչպես վերջերս բացատրեց ԱՄՀ-ի գործադիր տնօրենի առաջին տեղակալ Գիտա Գոփինաթը, տնտեսական մասնատումը կարող է հեռու գնացող հետեւանքներ ունենալ առեւտրի վրա, ինչպիսիք են արդյունավետության նվազումը, եւ մեծացնել մակրոֆինանսական անկայունության ռիսկը: Մասնատումը կարող է նաեւ նվազեցնել կապիտալի հոսքը դեպի Գլոբալ հարավ եւ խաթարել աշխարհում հանրային բարիքների տրամադրումը, այդ թվում՝ կլիմայի ոլորտում:

Նյութը հեղինակային է և պաշտպանված օրենքով