ԱՄՆ Դաշնային պահուստային համակարգը (ԴՊՀ-Fed) բարձրացրել է բազային տոկոսադրույքը 25 բազիսային կետով՝ մինչև տարեկան 4,75-5% մակարդակ:
Ցուցանիշն ամենաբարձր մակարդակի վրա է 2006 թվականից ի վեր, երբ այն հասել է տարեկան 5,25%-ի։ Ավելի վաղ՝ փետրվարին, Fed-ը բարձրացրել էր տոկոսադրույքը 25 բազիսային կետով՝ դեկտեմբերին կայացած նիստում այն 50 բազիսային կետով բարձրացնելուց հետո: Անցյալ տարվա մարտին կարգավորիչը 2018 թվականի դեկտեմբերից ի վեր առաջին անգամ բարձրացրեց տոկոսադրույքը այն բանից հետո, երբ 2020-ին, ի պատասխան կորոնավիրուսային համաճարակի ծանր տնտեսական հետևանքների, այն չնախատեսված իջեցրեց տարեկան 0-0, 25%-ի:
Բացի այդ, Fed-ը հաստատել է, որ կշարունակի կրճատել ակտիվները իր հաշվեկշռում՝ հետևելով 2022 թվականի մայիսին հրապարակված պլանին: Ըստ պլանի՝ կրճատումը սկսվել է հունիսի 1-ից: Առաջին երեք ամիսներին նախատեսվում էր ակտիվները կրճատել ամսական $47,5 միլիարդով, որից $30 միլիարդը գանձապետական արժեթղթեր են, $17,5 միլիարդը՝ հիփոթեքային արժեթղթեր։ Այնուհետև կրճատման տեմպերը պետք է կրկնապատկվեին՝ ամսական մինչև $95 մլրդ։
Fed-ը նշում է, որ տոկոսադրույքի հետագա բարձրացումը տեղին կլինի: Կենտրոնական բանկը դեռևս ակնկալում է երկարաժամկետ հեռանկարում հասնել տնտեսության մեջ առավելագույն զբաղվածության և 2 տոկոս գնաճի:
«Դրամավարկային քաղաքականության մեջ համապատասխան դիրք ընտրելիս կոմիտեն կշարունակի վերահսկել մուտքային տեղեկատվության ազդեցությունը տնտեսական հեռանկարի վրա: Կոմիտեն պատրաստ կլինի համապատասխան կերպով հարմարեցնել դրամավարկային քաղաքականությունը, եթե կոմիտեի նպատակների համար ռիսկեր առաջանան»,- ասել է կարգավորիչը
Նյութը հեղինակային է և պաշտպանված օրենքով
