ՀՀ վարչապետ Նիկոլ Փաշինյանը ՀՀ գյուղատնտեսության նախարարության աշխատակազմին է ներկայացրել ՀՀ գյուղատնտեսության նորանշանակ նախարար Արթուր Խաչատրյանին և շնորհակալություն է հայտնել նախկին նախարար Իգնատի Առաքելյանին՝ ներդրված ջանքերի համար:
Վարչապետ Փաշինյանը նշել է, որ գյուղատնտեսությունը ռազմավարական ուղղություն է և ոլորտում մեծ ներուժ կա, որը զսպանակված վիճակում է գտնվում, բայց որոշակի քաղաքական բարենպաստ պայմանների առկայությունը հնարավորություն կտա, որ այդ զսպանակը բացվի և ոլորտում իրական ու որակական փոփոխություններ տեղի ունենան: Իր խոսքում վարչապետը կարևորել է նաև գյուղատնտեսական վարկերի հետ կապված խնդիրների լուծումը:
Գյուղատնտեսության նախարար Արթուր Խաչատրյանն իր հերթին շնորհակալություն է հայտնել Իգնատի Առաքելյանին համագործակցության համար՝ հույս հայտնելով, որ այն կլինի շարունակական:
Իգնատի Առաքելյանը նշել է, որ նորանշանակ նախարարի հետ հասցրել են քննարկել գյուղատնտեսության առաջնահերթությունները, փոխանցվել են բոլոր ծրագրերը՝ ընդգծելով, որ մշտապես պատրաստ է իր աջակցությունն ունենալ:
Նյութը հեղինակային է և պաշտպանված օրենքով
