Կառավարությունը հաստատել է հարկային օրենսգրքում նախատեսված փոփոխությունների նախագիծը, ըստ որի` ՀՀ–ում բանկերին թույլատրվում է «ներել» քաղաքացիների`անհուսալի ճանաչված վարկերի գծով հաշվարկված տույժերն ու տուգանքները:
«Այս փոփոխությունները վերաբերում են միայն այն ֆիզիկական անձանց, որոնց վարկերը ճանաչվել են անհուսալի մինչև մայիսի 31–ը», – նախագիծը ներկայացնելիս նշել է ՀՀ ֆինանսների նախարար Ատոմ Ջանջուղազյանը։
Նշվել է նաև, որ այսուհետև բանկերին թույլատրվում է չվճարել եկամտահարկ այն տույժերի և տուգանքների մասով, որոնցից նրանք կհրաժարվեն, այն դեպքում, երբ ավելի վաղ նրանք ստիպված էին անել դա` անկախ այն բանից` տուգանքը գանձվել է, թե ոչ։
Նախարարը նաև ընդգծել է, որ տուգանքից ազատումը չի նշանակում ազատում հիմնական գումարի վճարումից։ Առաջարկվող նախաձեռնությունը չի կրում պարտադիր բնույթ, և բանկերն ազատ են իրենց որոշման մեջ, որը վերաբերում է վարկառուին տուգանքների վճարից ազատելուն։
Ըստ նախագծի, տույժերից և տուգանքներից ազատելու պայմանավորվածությունը հնարավոր է միայն այն դեպքում, եթե հիմնական գումարը վճարվի 90 օրում։
ՀՀ վարչապետ Նիկոլ Փաշինյանն իր հերթին նշել է, որ այս որոշումն ուղղված է բանկերի և վարկառուների հարաբերությունների բացասական երևույթների վերացմանը։
«Մենք այս փոփոխությունով դե–ֆակտո առաջարկում ենք, որպեսզի քաղաքացիներըqq գան այն սկզբնական վիճակին, որը հաստատվել էր պայմանագրով բանկի և փոխառուի միջև։ Այսինքն, նրանց հարաբերությունների ողջ բացասական պատմությունը ջնջվում է, և նրանք փորձում են նոր էջից սկսել իրենց հարաբերությունները», – ասաց նա։
Նյութը հեղինակային է և պաշտպանված օրենքով
