Ճարտարապետության և շինարարության Հայաստանի ազգային համալսարանի (ՃՇՀԱՀ) ռեկտոր Գագիկ Գալստյանը և «Արարատբանկի» գործադիր տնօրեն Աշոտ Օսիպյանը համալսարանում կնքել են համագործակցության հուշագիր։
Կողմերը կարեւորել են մասնավոր հատված-բուհ համագործակցությունը կրթական ծրագրերում:
Ինչպես «Արմենպրես»-ին տեղեկացրեց ՃՇՀԱՀ-ի մամուլի քարտուղար Ժասմին Վիլյանը, հուշագրի համաձայն՝ համալսարանի տնտեսագիտության, հաշվապահական հաշվառում և հարկում, անշարժ գույքի փորձաքննություն կրթական ծրագրերը կկատարելագործվեն։
«Արարատբանկը» և ՃՇՀԱՀ-ը համատեղ կմշակեն կրթական ծրագրերի բարելավմանն ուղղված առաջարկություններ, կկազմակերպվեն ուսումնական պրակտիկաներ, գիտաժողովներ, սեմինարներ, վերապատրաստման դասեր և բաց դռների օրեր՝ բանկի աշխատանքներն ու գործառույթները ներկայացնելու նպատակով։
ՃՇՀԱՀ-ի ռեկտոր Գագիկ Գալստյանի խոսքով՝ Արարատբանկի հետ համագործակցությունը էականորեն կնպաստի ուսանողների մասնագիտական աճին եւ հնարավորություն կընձեռնի նրանց հետագայում ներգրավվելու երկրի տնտեսության և շինարարության ոլորտների գործընթացներում:
Նյութը հեղինակային է և պաշտպանված օրենքով
