Բիզնես Արմենիայի գործադիր տնօրեն Արմեն Ավակ Ավակյանը և Դոնորների հետ հարաբերությունների խմբի ղեկավար Արման Ուդումյանը Լոնդոնում՝ Վերակառուցման և զարգացման եվրոպական բանկի գլխամասային գրասենյակում, մասնակցել են «Զարգացող Եվրոպա» միջոցառումների շարքին։
Ներդրումների խթանման հայաստանյան կառույցի ներկայացուցիչները Միացյալ Թագավորության Վեսթմինսթերյան պալատում մասնակցել են ՎԶԵԲ ընդունելությանը։ Այն կազմակերպվել է Կենտրոնական և Արևելյան Եվրոպայի ներդրումների խթանման կառույցների ղեկավարների համար։
Միջոցառումների օրերին տարբեր երկրների գործընկեր կառույցների ներկայացուցիչների հետ տեղի են ունեցել մի շարք հանդիպումներ, քննարկվել գործակցության ծրագրեր։ Բիզնես Արմենիայի թիմը ներկայացրել է Հայաստանի ներդրումային միջավայրը, օտարերկրյա ներդրողների անընդհատ աճող հետաքրքրության պայմաններում երկրի նոր կառավարության քաղաքականությունը, հիմնադրամի փորձը։
«Սա եզակի հնարավություն էր մեկ վայրում հանդիպելու 22 գործընկեր կառույցների ներկայացուցիչների հետ, որը այլ պարագայում կամ անհնարին կլիներ, կամ անհամեմատ մեծ ժամանակային ու ֆինանսական ռեսուրսներ կպահանջեր։ Լոնդոն էինք մեկնել հետաքրքիր գաղափարներով, վերադառնում ենք արդյունավետ գործակցության նախնական պայմանավորվածություններով»,- նշել է Բիզնես Արմենիայի Դոնորների հետ հարաբերությունների խմբի (նախկին) ղեկավար Արման Ուդումյանը։
ՎԶԵԲ գործարար հանդիպումների շրջանակում անցկացվել է «Զարգացող Եվրոպա» մրցանակաբաշխությունը, որտեղ Բիզնես Արմենիան Կենտրոնական և Արևելյան Եվրոպայի 23 կառույցների շարքում առաջադրված է եղել «Ներդրումների խթանման տարվա ազգային մարմին» անվանակարգում։ Առաջադրումների համար հիմք են հանդիսացել 23 երկրների ներդրումների խթանման կառույցների գործունեության՝ ՎԶԵԲ հետազոտությունները։
«Հանդիպումներից բացի կարևորում ենք նաև ՎԶԵԲ մրցանակաբաշխության մեթոդաբանությունը, որով կատարվել է ընտրությունը։ Բիզնես Արմենիայի կարողությունների հզորացմամբ, հաջորդ մրցանակաբաշխությանը, մեր կառույցը կհավակնի լինելու լավագույնը»,- նշել է Բիզնես Արմենիայի գործադիր տնօրեն Արմեն Ավակ Ավակյանը։
Նյութը հեղինակային է և պաշտպանված օրենքով
